21

"Scienza on line". Traductor Luca Ghitti

Le major parte del planetologos accepta le patrono que Marte era un tempore un planeta tepide dotate de aqua al stato liquide. Ora, tamen, in un articulo publicate in le "Geophysical Research letters"alcun astronomos ha suggerite un nove theoria del evolution de Marte, secundo le qual le planeta ha essite sempre un deserto congelate e sin vita.

Nick Hoffman del Universitate de Melbourne (Australia), sustene, in effecto, de haber le probas necessari a confutar le modello le plus diffundite. Ille ha studiate le varie structuras martian create per le erosion, como le valles e le canales, e ille ha pervenite al conclusion que le anhydrido carbonic e non le aqua, es le ver responsabile del formation de iste structuras.

"Nos besonia pensar plus clarmente ubi poterea esser le vita super Marte e ubi colliger specimenes" ha explicate Hoffman. Si il ha vita super Marte il es probabile que illo se trova in le subterraneo, a multe kilometros in profunditate.

Le Nasa (le agentia spatial american) ha cercate in iste annos le vita super Marte basante se super le hypothese que in le superficie del planeta il habeva le aqua liquide. In iste ultime recerca le scientistas ha studiate in maniera particular le canales constituite per areas de terreno que se trova al longe del bassino Hellas, un crater de impacto de 2 000 kilometros de diametro e vetule 3,5 milliardos de annos. Le datos suggere que iste canales ha essite probabilemente excavate per detritos transporatate per le anhydrido carbonic, plus tosto que per fontes de aqua calide.

Hoffman crede que le canales del bassino Hellas se ha formate quando le lava vulcanic se ha miscite con le anhydrido carbonic congelate in le subterraneo, que se ha expandite con violentia, faciente collapsar le terreno. Le anhydrido carbonic, nunc jam liquide e gasose, ha agite como un lubrificante, facilitante le fluxo del detritos solide.