25

Le revista american "Science" ha publicate in su edition electronic le resultatos de recercas multo remarcabile e facite per duo biologos molecular danese del universitate de Kopenhagen. Iste recercatores Eske Willerslev e Anders Hansen ha trovate in le permafrost de Siberia parve quantitates de ADN que ha un etate de 10 000 usque a 400 000 annos

Le daneses poteva monstrar que le ADN trovate pertineva a al minus 19 sortas de plantas e a animales prehistoric como le mammut lanose, le ovibos e le lemming. Pro le prime vice le ancian ADN non ha essite extrahite ab fossiles,ma directemente ab radices de plantas e ab feces e urina de animales.

Le ADN vegetal indica que in ancian tempores Beringia, un region que se extende inter Siberia oriental e Alaska, esseva un steppa con vegetation luxuriante in vice de un tundra. Ma ante circa 10 000 annos le percentage del herbas in le vegetation se reduceva de 36 per cento a solmente 3 per cento, lo que esseva probabilemente le consequentia de cambios del climate. Iste diminution drastic de nutrimentos esseva sin dubita le ver causa del extinction, in iste regiones, del grande herbivoros como le mammut lanose. Isto contradice le theoria popular que assere que lor extinction esseva causate del chassa per le homines prehistoric.