3

Le vocabulario commun del linguas occidental pote functionar in un systema coherente de communication. Assi se presenta un lingua autonome. Le nomine de iste lingua es Interlingua.

Non fabricate
Interlingua non es un lingua artificialmente fabricate secundo preferentias particular de un sol persona o de un gruppo isolate de individuos. Le vocabulario commun del linguas occidental esseva le directiva, e iste vocabulario jam existe 2.000 annos. Illo ha su origines in le linguas latin e grec, que deveniva tanto importante pro le cultura, primarimente in Europa, ma postea anque in le mundo integre.

Latino moderne
De facto Interlingua non es un nove creation, ma solmente le re-initiate functionamento del latino in un forma moderne, como illo potentialmente continuava de exister, principalmente in le linguas romanic e anglese, ma su sphera de penetration se extendeva in omne linguas occidental e in alteres.

Vocabulario international
Post un profunde studio del elementos commun in le linguas principal europee on ha evolvite certe principios pro le selection e le forma del parolas in Interlingua. Le principios fundamental es:

1. Un parola es adoptate in Interlingua, si illo es commun a al minus tres del linguas anglese, francese, espaniol/portugese, italian.

2. Si le parola es commun in duo de iste linguas, su existentia in germano e/o russo es decisive.

3. Le forma standardisate de un parola debe esser maximalmente conforme al linguas mentionate, i.e. apparer como le denominator commun del vocabulos e elementos in le linguas fonte.

Grammatica simple
Le principio fundamental es que le grammatica debe esser le systema le plus simple que es possibile pro possibilisar le uso del vocabulario in un coherente lingua. Isto significa le exclusion de varie particularitates e formas specific del linguas constituente, ergo nulle generes masculin e feminin, nulle declinationes e nulle conjugationes irregular de verbos.

Avantages
Pro personas qui es familiar con le vocabulario panoccidental Interlingua es comprensibile a prime vista. Per un texto in Interlingua on pote attinger un grande publico multinational cultivate.

Pro altere personas Interlingua offere un utile introduction al tresor de vocabulos scientific, technic e cultural. Illo anque facilita le lectura de linguas romanic. Interlingua pote esser un profitabile factor supplementari in studios linguistic.

Le internationalitate del vocabulario e le simplicitate del grammatica possibilisa al lector o studiante tosto occupar le position de un active usator de Interlingua.