In mi jornal del 8 de martio del anno currente io ha legite le historia del morte tragic, a quasi le mesme momento, de duo fratres gemine de 71 annos in duo accidentes separate ma simile. Le accidentes ha evenite in Finlandia, a curte distantia del capital Helsinki. Un del fratres ha trovate un morte subite bicyclante tranquillemente super un cammino gelate e glissante, ubi un camion pesante le ha occidite. Circa duo horas postea su fratre gemine transversava, anque a bicycletta, le mesme cammino. E anque ille esseva toccate per un grande camion que le ha occidite. Isto ha evenite a pena a un e medie kilometros del loco ubi su fratre habeva perdite le vita. Il es multo probabile que le secunde fratre non sapeva le morte del prime, nam le policia non jam habeva informate le familia. |