Le urbe Gdansk (population circa 465.000), antea anque nominate Danzig in germano, es ora le capital del provincia polonese Pomorze. Illo es situate al loco ubi le fluvio le plus importante del pais, le Vistula, disbucca in le Mar Baltic. Un grande parte del industria del urbe es centrate circum le construction de naves e le navigation. Le urbe ha duo areas portuari. Le Nove Porto es un grande centro industrial con cantieres naval, manufacturas metallurgic e chimic, molinos a serrar ligno e fabricas que produce alimentos. Le Porto Polnocny o Porto Nord es le plus grande projecto de disveloppamento maritime. Hic eveni le exportation de carbon e le importation de petroleo. Gdansk ha scholas de medicina, de ingenieria e de belle artes. In le anno 1970 on ha aperite le nove universitate. Il ha anque multe ecclesias magnific, theatros e museos interessante, belle jardines e parcos, un centro maritime, un hall de concertos e un opera. Gdansk es un parte del Trojmiasto (Urbe Triple), que se compone del urbes Gdansk, Gdynia e Sopot. Le centro urban, cognoscite como Stare Miasto o Ancian Urbe, es situate al bordo del Motlawa, un riviera que disbucca in le Vistula. Edificios remarcabile in le Ancian Urbe include le Ecclesia de Sancte Catherina, del qual alicun partes data del 14-te seculo. Su interior es in stilo gothic. Le casa municipal ha essite construite inter 1587 e 1595. In le hall de entrata on vide un sculptura in basse-relievo de bronzo del astronomo de Gdansk, le famose Hevelius, qui ha vivite in le 17-me seculo. In le curso de un medie seculo on ha restaurate tote le edificios historic del urbe, que habeva suffrite damnos enorme in le ultime menses del secunde guerra mundial. Le prime mention de Gdansk como un urbe polonese data de 997 o 999. In le anno 1260 illo ha obtenite autonomia municipal.Alora ille se ha disveloppate como un centro de commercio. In 1308 le Cavalleros Teutonic ha conquerite le urbe. Sub lor governamento le urbe ha devenite un membro prospere del Liga Hanseatic. In 1466 le rege Casimir IV de Polonia ha reganiate le territorio post un guerra de dece-tres annos. Como regratiamento pro le loyalitate del urbe le rege ha date autonomia local a Gdansk. Tosto le urbe se ha expandite multo. Illo ha attingite su culmine durante le periodo del Renascentia como le porto le plus prospere del Baltico. Su cantieres naval construeva lor prime nave de guerra in 1572. Alicun annos postea su population cresceva a 77000, le plus grande inter le urbes de Europa oriental. Le guerras svedese del 17-me seculo ha stoppate le crescentia economic del urbe e le declino ha comenciate. In 1772 Prussia ha conquerite Gdansk e in 1793 illo ha devenite un parte de iste pais. Alora su activitates portuari discresceva rapidemente. Con le exception de circa septe annos durante le guerras napoleonic, quando illo esseva declarate un stato libere, Gdansk remaneva in manos german usque a post le prime guerra mundial. Inter 1919 e 1939 illo habeva de novo le status de un urbe libere, sub le Tractato de Versailles, con Polonia habente grande influentia governative super le urbe. Tamen le influentia de Germania deveniva plus forte, e in 1938 le dictator german Adolf Hitler exigeva que Gdansk debeva esser date a Germania. Polonia, appoiate per Grande Britannia e Francia, refusava. Hitler usava iste refusa como un excusa pro le invasion de Polonia in septembre de 1939, le comencio del secunde guerra mundial. In martio 1945 le urbe retornava a Polonia. Conflictos inter le direction communista e le personal del cantier naval de Gdansk in le anno 1980 duceva al creation del syndicato obrer Solidaritate. Isto ha resultate tosto in democratia in Polonia. Le guerras svedese del 17-me seculo ha stoppate le crescentia economic del urbe e le declino ha comenciate. In 1772 Prussia ha conquerite Gdansk e in 1793 illo ha devenite un parte de iste pais. Alora su activitates portuari discresceva rapidemente. Con le exception de circa septe annos durante le guerras napoleonic, quando illo esseva declarate un stato libere, Gdansk remaneva in manos german usque a post le prime guerra mundial. Inter 1919 e 1939 illo habeva de novo le status de un urbe libere, sub le Tractato de Versailles, con Polonia habente grande influentia governative super le urbe. Tamen le influentia de Germania deveniva plus forte, e in 1938 le dictator german Adolf Hitler exigeva que Gdansk debeva esser date a Germania. Polonia, appoiate per Grande Britannia e Francia, refusava. Hitler usava iste refusa como un excusa pro le invasion de Polonia in septembre de 1939, le comencio del secunde guerra mundial. In martio 1945 le urbe retornava a Polonia. Conflictos inter le direction communista e le personal del cantier naval de Gdansk in le anno 1980 duceva al creation del syndicato obrer Solidaritate. Isto ha resultate tosto in democratia in Polonia. |