41

Il es ver que ubique in le mundo on trova le mineral jada, ma solmente in China, ubi le reputation de iste petra ha prendite dimensiones quasi mystic e ubi illo es appreciate plus que le auro e le argento, le arte de taliar le jada ha attingite un forma de perfection.

On pote sequer a transverso tote le historia de China le grande veneration del jada, ab le comenciamento del neolithico de ante plus de septe milles annos usque a hodie. Il esserea quasi impossibile de parlar de China e de su ricchessas cultural sin arrivar al cultura del jada del chineses e al importantia de iste petra pro le disveloppamento artistic del pais. Durante le prime quatro milles annos del historia chinese le jada ha superate tote le altere minerales tanto forte in importantia, que hodie on nomina iste periodo le era del jada.

Excavationes del ultime 25 annos ha monstrate que le petra que on ha usate pro facer le objectos del prime periodo del neolithico, es originari de jacimentos al interior de China, ma iste locos esseva exhaurite jam tosto. Postea le plus grande parte del material ha su origine in le region de Khotan e Jarkand in le montanias centroasiatic de Kunlung, a 800 kilometros al nord de Delhi. Il va sin dicer que sovente le transporto super le longe camminos primitive esseva difficile. In le 18-ime seculo on ha importate jadaite anque ab Birma. E alora un varietate con remarcabile maculas verde obscur ha venite de Siberia.

In le Occidente le parola jada es usate pro duo sortas de petra toto differente: nephrite e jadaite. Ambe minerales es petras multo dur e decorative, ma chimicamente illos non monstra similantia. Le nephrite es un petra con un structura dense e fibrose, que on trova in nuances de colores que varia de nigre via diverse colores verde a quasi blanc. Le superficie pote esser polite, ma illo non obtene un alte brillantia; illo da plus tosto un impression ceree e saponacee. Le jadaite, que se presenta in toto un paletta de colores magnific, pote esser polite de maniera tanto brillante e vitree que le bellissime variante verde es un petra preciose multo desirate.

In ultra le chineses (principalmente desde le 8-ime seculo) ha disveloppate technicas que per medio de calefaction e substantias chimic colorante cambia le colores natural del nephrite e del jadaite. De iste maniera le paletta de colores se ha extendite. Le partes blanc super statuettas funeral de jada se forma o per reactiones chimic natural con le terra o de maniera artificial calefaciente intensemente le jada.

In le ultime 250 annos le jadaite es importate super toto ab Birma, e le objectos facite con iste material pote dunque esser considerate pro le plus grande parte como relativemente recente.

Independentemente del raritate e del beltate le jada representa anque notiones confucian de valor, que es estimate altemente per le chineses cultivate e que attribue al charme mysteriose de iste petra: incontestabilemente le jada ha qualitates tactile e le chineses ama portar con se parve objectos de jada, pro exemplo pendentes, perlas o flacones de tabaco de prisa, que es destinate a esser toccate, como le cordas a precarias in le paises circum le parte oriental del Mediterraneo. Al prime tocca le petra es frigidissime, ma illo se caleface rapidemente in le mano. Illo es solide, non se rumpe, e malgrado le facto que illo pote esser providite de lateres acute, illo non pote vulnerar vos como le silice o le obsidiano. Le jada es un material multo dur con lequal on pote, sin problemas, facer incisiones in le vitro e in le aciero.