In le curso del 50 annos veniente on videra un diminution del populationes de paises como China, Japan e Corea del Sud, lo que causara que un numero minus grande de personas laborante debera sustener plus de personas non-laborante. Alteremente le populationes de paises como Bangladeh, Pakistan e Afghanistan va duplicar se in le proxime 25 annos, lo que provocara disoccupation structural, scarsitate enorme de alimentos e altere seriose problemas social-economic. Isto es le imagine que schizza le Banca de Disveloppamento de Asia (BDA) in su presentation in Singapore de un recerca a tendentias demographic in Asia. Plus que le medietate del population mundial, 3,3 milliardos de personas, vive in Asia. In le anno 2050 iste numero essera 4,8 milliardos malgrado le facto que in Asia le population cresce nunc minus rapidemente que in le seculo passate. Secundo le BDA isto es causate per le phenomeno moderne que un crescente numero de feminas labora o va laborar professionalmente, per le facto que plus de asiaticos e asiaticas applica o applicara methodos de anticonception e anque proque sempre plus de personas recipe un melior inseniamento. Ubi le population cresce, le paises menacia venir in un situation de haber troppo pauc terras pro le production de nutrimentos pro sempre plus de habitantes. Independentemente de un crescimento o discrescimento del population le urbes va plenar se. Le consequentia es paupertate e un enorme pression super le assistentia sanitari, super toto causate per le contamination per le HIV. Al presente il ha al minus 6,6 milliones de asiaticos contaminate per le HIV. Le anno passate plus de un million de personas esseva infectate e le SIDA occideva quasi un medie million de personas. |