45

In le proxime annos le population de Africa del Sud va crescer a pena. Le causa es le sida que exige un sempre plus grande numero de victimas. Iste phenomeno se monstra in le datos del recercas del Universitate de Africa del Sud in Pretoria.

On ha calculate que, si on non trova un solution pro le problema del sida, tosto le population va discrescer. Provisorimente il ha ancora un crescentia legier con un media inter 1996 e 2006 de 1,35 percent per anno. Ma le alte grado de infection inter adultes - taxate officialmente a 10 percent, ma que es probabilemente le duple - annuncia un catastrophe terribile.

In alicun provincias jam ora on ha attingite le crescentia-zero e on expecta que altere provincias va sequer. Le recercatores vide que le curva national continua a bassar e que post cinque annos illo va passar le puncto zero.

Si le nivello de infection resta le mesme, le population post 2006 va discrescer continuemente. E si le grado de infection augmenta comparate a illo de iste momento, le discrescentia del population va esser ancora plus forte.