Le calefaction global del ultime decennios ha causate gradualmente plus alte temperaturas anque in Europa. Un phenomeno agradabile? Isto poterea esser le conclusion del personas qui detesta le frigido del hiberno e ama le calor del estate. Regrettabilemente le altiamento del temperaturas in nostre parte del mundo non ha remanite sin consequentias negative. Un del effectos le plus disagradabile es le phenomeno que diverse insectos periculose de Asia e de Africa ha potite facer lor intrata in nostre continente devenite troppo calide. Il ha inter iste parve bestias un specie robuste de mosquitos, le mosquitos tigre, que es signalate in Roma jam desde dece annos. Le municipalitate de Roma adverti le habitantes del capital italian contra iste grande mosquitos que ha venite de Asia, nam lor piccaturas pote transmitter maladias periculose como per exemplo le dengue*, un febre que es mortal in multe casos. Le mosquitos tigre que es plus forte que le mosquitos ordinari comencia a infestar le urbe sempre plus. Recentemente on ha constatate que le bestia se ha propagate a altere partes del nord de Italia. E anque in le Francia meridional on ha trovate le prime exemplares. Intertanto on es consciente del nove periculo que menacia le sanitate del population europee. Scientistas de diverse paises europee adverti contra le venita del mosquitos mortal. Illes ha fundate un organisation, le Association Europee del Controlo de Mosquitos, establite in Strasbourg, que jam ha comenciate su labores. On se occupa non solmente del inventarisation del problema ma on se effortia anque pro trovar medios e methodos efficace pro exterminar radicalmente iste nove inimicos insidiose de nostre sanitate. *) dengue = knokkelkoorts (in nederlandese) |