Un gruppo de recercatores del Universitate de Australia ha revelate le provas de un evento que probabilemente ha stimulate le epidemia de influenza del anno 1918, un del plus virulente del historia. Le discoperta, describite in un articulo divulgate in "Science" ha essite facite analysante le datos genetic relative al virus, e nunc le genetistas spera succeder a comprender proque illo ha essite assi mortal. Le epidemia se ha diffundite in tote le mundo. Partiente del Statos Unite illo ha attingite Japon e Australia, e finalmente Europa, occidente plus de 20 milliones de personas, plus que durante tote le prime guerra mundial. Le virus non ha essite insulate e conservate in ille tempore e le reercatores credeva que illo era perdite pro semper. In le anno 1999, tamen, on ha obtenite material genetic per un victima, cuje corpore era remanite sepelite in le permafrost de Alaska, e per specimens extrahite ex duo soldatos american morite durante le epidemia e mittite sub alcohol per un medico de ille tempore. Le recercatores ha potite assi extraher un parte del genoma del virus, e confrontar lo con illo de altere brancas de influenza, sin trovar initialmente explicationes plausibile. Nunc, tamen, on ha discoperite que un del genes del influenza de 1918 era un hybrida, producite per partes de altere duo viruses del influenza forsan proveniente ex un animal como le porco per medio de un processo cognoscite como recombination. Le analyse indica que iste processo ha evenite justo ante le epidemia e exactemente pro iste motivo on pensa que il ha potite initiar le influenza. Nunc on va studiar le possibilitates que brancas actual de influenza poterea haber pro recombinar se e dar initio a un altere periculosissime epidemia. |