Il non es difficile de perder un superscarpa de cauchu in le tram al horas de affluentia: vos es serrate de tote le lateres: si qualcuno vos marcha super le talon, vos es discalceate in un momento. Isto me ha occurrite. Io ha entrate in le tram con mi duo superscarpas al pedes. Descendente al halto de destination io habeva ancora un sol super-scarpa. Le calceo esseva ancora a mi pede, anque le calcetta, assi que le pantalon, ma le superscarpa mancava. Que facer? Il esseva impossibile pro me de currer detra le tram pro attinger lo. Io ha inveloppate dunque in un jornal le superscarpa que me restava, e ha vadite a mi officio. "Post mi labor del die, io me diceva - io va cercar lo. Io non pote lassar perder un objecto si rar in iste tempores costose. Il es multo probabile que finalmente io va retrovar lo." Quitante mi officio, io ha comenciate mi recercas. Ante toto io ha visitate un amico qui es controlator de tram pro haber su consilio. "Il es un facto multo felice pro te, ille me diceva, que tu lo ha perdite in un de nostre wagones. Concernente le locos public in general, il ha nulle garantia de retrovar le cosas que on ha perdite in tal locos. Ma le organisation del tram-vias es le securitate ipse: nos ha un deposito de objectos trovate. Va illac pro reprender tu scarpa." - Gratias, io diceva a mi amico, pro le bon consilio que tu me da. Mi super-scarpa es ancora bon: io lo porta a pena duo saisones!" Le die sequente io me ha presentate al deposito. "Ha il un medio de retrovar hic un superscarpa que io ha perdite heri in le tram?" - Isto es possibile, on me respondeva, ma como es vostre superscarpa? - Oh, illo es multo ordinari.... mesura 40 ... - Nos ha forsan duodece milles exemplares del mesura 40. Signos distinctive? - Sempre le mesmes: talon guastate per le uso e il manca un parte del revesti-mento al interior... - Nos ha plus de mille superscarpas de iste genere. Il non ha altere signos particular? - Si, le puncta es un pauco laxe e le talon non es ben fixate, ma le resto es ancora in bon stato. - Sede vos un momento. Io va vider." Io ha attendite alicun minutas. Subito io ha vidite apparer le empleato con mi superscarpa in le manos. Un emotion me ha invadite. Ecce un organisation que functiona excellentemente! Ver idealistas, iste gente! "Amicos, io declarava al empleatos del officio, usque a mi morte io me rememorara vostre benefaciente activitate. Da me iste objecto retrovate. E gratias! - Non si rapidemente, car camerada +)! Nos non pote dar vos lo sin esser certe que vos es le persona qui lo ha perdite. - Ma io es iste persona, io exclamava, sin alicun dubita! Io pote dar vos mi parola de honor! - Nos vos crede voluntarimente, e nos vos comprende. Il es toto probabile que vos ha perdite iste superscarpa. Ma nos non pote dar vos lo assi: vos debe apportar un certificato in bon e debite forma, remittite per vostre Comité Local +), que garantia que vos ha veritabilemente perdite un superscarpa in un wagon del tramvia, e anque un certificato de domicilio. A ille momento, sin facer durar le procedura, on vos remittera le objecto que vos ha legalmente perdite." Io replicava: "Oh, mi bon amicos, le factos essente ignorate a mi domicilio, como es il possibile que mi Comité Local me darea le certificato que vos me demanda? - Illo vos lo dara. Illo debe facer isto. Illo existe pro facer isto!" Le die sequente io visitava le presidente del Comité. Io le exponeva mi caso. "Da me iste papiro, nam mi superscarpa es in periculo! - Vos lo ha vermente perdite? O vole vos mystificar nos pro appropriar vos toto simplemente un objecto de uso currente que non vos pertine? - Io vos dice le veritate pur e clar, io lo ha perdite heri in le tram. - Il es evidente, remarcava le presidente, que io non pote haber fiducia in vostre parola. Ma si vos poteva apportar me un certificato, remittite per le deposito del tramvias que declara que vos ha vermente perdite vostre super-scarpa, le caso es differente: alora io poterea facer pro vos le papiro que vos me demanda. - Mi car senior, exactemente iste deposito me ha inviate a vostre officio! - Alora, face un demanda scripte. - Un demanda de que? - Scribe: " A un certe data io ha constatate ...", etc. E vos debe promitter de non quitar le urbe ante le complimento de nostre inquesta." Io redigeva le demanda requirite. Le die sequente le presidente me remitteva mi certificato in bon e debite forma. Con iste papiro io retornava al deposito, e illac, crede me o non, on me ha rendite mi superscarpa sin altere formalitate. Ecce como labora iste servicio. In minus de un septimana de activitates variate io ha potite recovrar mi proprietate. Mi sol adversitate es que in le curso de iste activitates io ha perdite mi altere superscarpa: io lo habeva inveloppate in un jornal que io portava sub le bracio. Ubi habeva io ponite iste pacchetto? Impossibile de rememorar me, ma in omne caso io es certe que io non lo ha perdite in le tram. Iste vice io non sape in qual direction io debe facer mi recercas. Ma io guarda sempre mi superscarpa retrovate. Quando io me senti discoragiate, su vista me reconforta: il ha servicios public que functiona rapidemente. +) Le historia eveni in Russia durante le periodo communista |