Secundo le theoria currente le extinction del sauros al fin del periodo cretacee ha essite causate per le impacto de un meteorite gigantesc. Ma, il habeva forsan un altere causa: manco de oxygeno! Iste es le opinion del doctor Rigby del Universitate de Notre Dame (Indiana), qui ha exponite iste theoria in undiscurso in Oxford in occasion del "septimana Britannic del Scientia" (18-22 de martio 1996). Su theoria resulta de investigationes facite in Montana, ubi on ha colligite succino*. Tote le parve bullas de aere in le succino trovate monstra que ante 70 milliones de annos il habeva un multo plus grande concentration de oxygeno in le atmosphera que circa 5 milliones de annos plus tarde al fin del cretaceo. Il se tracta hic de un dimunition a pena concipibile: ab plus de 30 % a circa 20 %. Le investigator veni al conclusion que le concentration de oxygeno mesmo intra un periodo de 500 000 annos ha diminuite de 8 %. Le nove (plus basse) concentration de oxygeno esseva, secundo Rigby, insufficiente pro le grande dinosauros, que besonia al minus 32 % pro ben functionar, Le extraordinarimente rapide diminution de oxygeno in le atmosphera esserea le consequentia de un cambio subite del climate. On sape que durante le cretaceo il habeva un climate multo calide, que se exprimeva inter alteres in un nivello alte del mar. Quando le temperatura bassava al fin del cretaceo, le nivello del mar bassava de circa 40 metros. In le aquas non troppo profunde del costas viveva innumerabile animales in un vegetation exuberante, Post le morte un parte considerabile del material organic esseva interrate in le sedimentos ante le costa. Ma, dice le doctor Rigby, quando al fin del cretaceo le nivello del mar bassava, multe fango con material organic se discoperiva. Le putrefaction de illo ha retirate al atmosphera quantitates enorme de oxygeno, lo que resultava in un diminution del concentration de oxygeno de 10 %. Rigby non nega que al fin del cretaceo un meteorite ha toccate nostre planeta con tote sorta de consequentias pro le flora e le fauna.Ille opina totevia que il ha un relation plus stricte con le diminution del oxygeno in le aere que con iste impacto de meteorite. *succino = resina fossilisate de pinos. |