55

un animal con ungues de 40 centimetros

In un petreria in le parte nordic de Utah (Statos Unite) on ha trovate un osso enorme. Illo es le ungue del plus feroce dinosauro que ha unquam vivite.

Ben que plus parve que le "Tyrannosaurus rex", illo habeva le habilitate de infliger plus de damnos, secundo le doctor Kirkland, experto de fossiles del "Dynamation International Society", cuje membros ha discoperite le ungue.

Iste animal, que habeva un altor de 7 metros, vadeva erecte e habeva un peso de un tonna, ha le nomine Velociraptor, lo que significa "predator de alte velocitate". Per le ungues terrific del pedes posterior illo occideva su victimas.

"Le osso trovate indica un ungue de 40 centimetros, lo que monstra que le animal esseva duo vices plus grande que ulle specie que on ha trovate in le passato", diceva le doctor Kirkland.

"Iste creaturas chassava in gruppos e per le dimensiones del cranio nos sape que illos esseva satis intelligente", ille diceva. "Illos curreva inter 50 e 70 kilometros per hora e lor longe caudas punctate los possibilisava de tornar subito sin perder le balancia."

"Illos esseva multo plus feroce que le altere species del dinosauro. On pote nominar los le "glotones" del mundo del dinosauros, simile in character al mustellas de nostre tempore, que vole attaccar e destruer animales multo plus grosse que illos ipse."

"Le creatura, que viveva ante circa 125 milliones de annos, es le plus ancian specimen trovate del Velociraptor. Le aves moderne es le descendentes de ancestres de iste bestie terribile, ma le craturas ipse non ha lassate descendentes. On suppone que illos ha disparite ante 65 milliones de annos."