Subito, ante cinque milliones de annos, in le breve periodo que separa le mioceno del plioceno multe species animal se ha extinguite super le terra. Il es ver que alora le scala de extinction esseva minus grande que ante 65 milliones de annos quando in le periodo inter le cretaceo e le tertiario un grande corpore celeste ha bombardate le terra. Tamen, in le caso plus recente le effecto esseva tanto grande que on ha constatate un cambiamento geologic de importantia. Ma pro le scientistas le causa de extinction in le periodo transitori inter le mioceno e le plioceno esseva sin explication. Ora il pare que un evento astronomic, a saper le explosion de un supernova, ha causate iste transition. Recercatores del Universitate de Illinois in le Statos Unite de America, collaborante con collegas del CERN in Suissa, ha trovate indicationes pro un tal catastrophe in le forma del isotopo Fe-60. In nucleos de sedimentos pelagic que ha un etate de cinque milliones de annos, le recercatores ha trovate un concentration altissime de iste isotopo extrememente rar in le natura. Pro un tal presentia ric de Fe-60 on non ha potite imaginar un causa terrestre. Ma le concentrationes trovate del isotopo rar es ben explicabile como le vestigios clar de un supernova que ha attingite le terra ante circa cinque milliones de annos. Le concentration relativemente alte de Fe-60 ha potite esser formate proque le explosion del supernova habeva loco a 'solmente' cento annos lumine distante del terra e dunque como consequentia quantitates relativemente grande del material ejectate ha attingite le terra. Secundo le opinion del astronomo Brian Fields le explosion ha causate super le terra un tanto alte intensitate de radiation cosmic que le biosphera esseva influite per illo, per exemplo per que le atmosphera lassava passar plus de radiation ultraviolette e/o per que un augmentation del nubes causava un "hiberno de radiation cosmic". Secundo le recercatores il ha indicationes que anque altere periodos durante le quales se extingueva massivemente species super le terra, es causate per supernovas in nostre galaxia. Illes crede que isto vale per exemplo anque pro le transition del duo ultime periodos del mioceno ante dece-tres milliones de annos. Alora se extingueva multe species animal que esseva al base del catena alimentari in le mar, como le zooplancton e le echinodermos, durante que le photosynthesis ha diminuite per le crescentia abundante de algas marin. Ben que le existentia sol del alte concentration de ferro-60 jam subtene fortemente le hypothesis de un supernova, le recercatores vole essayar de trovar un plus grande numero de argumentos. Illes cerca altere isotopos que indica un mesme origine. Isto vale per exemplo pro plutonium-244. Secundo le recercatores un analysis plus exacte de isotopos 'estranie' in le nucleos de forage de sedimentos pelagic poterea augmentar le comprension del processos que jocava un rolo durante le origination e le explosion de un supernova. |