Ante 1250 annos le evangelisator Bonifacius ha essite assassinate in le proximitate de Dokkum situate in le actual provincia Frisia (Friesland). Qui esseva Bonifacius? Ille ha venite al mundo in 674 in le sud de Anglaterra, in un familia fortunate. Su parentes le dava le nomine Wynfreth. Al etate de 7 annos ille esseva cedite per su parentes a un monasterio benedictin, ubi ille apprendeva a leger e a scriber. Le puero se distingueva como un alumno excellente. Ille ipse esseva desde le plus tenere infantia inspirate pro dedicar su vita a Deo e a su servicio. In 716 Wynfreth iva como missionario a Frisia. Tamen ille debeva quitar le region, non potente complir su mission a causa del attitude hostil del rege frisian Radboud. Post alcun annos ille decideva viagiar a Roma, ubi ille incontrava le Papa Gregorius II, qui le dava le mission de christianisar le gentiles in Germa-nia. Gregorius le dava un nove nomine Bonifacius, como ille se nominava postea. Le evangelisator laborava in Bavaria e Thuringia, ma quando ille esseva informate del morte del rege Radboud, ille retornava a Frisia. Alora, sub le direction de su compatriota Willebrord, le prime episcopo de Utrecht, Bonifacius comenciava a predicar le evangelio. Tosto Bonifacius ipse esseva consecrate episcopo e dirigite de novo a Germania, ubi in 731 le Papa GregoriusIII le dava le dignitate de metropo-litano de Mainz. Un decennio plus tarde Bonifacius fundava le famose abbatia de Fulda. In le anno 754 ille se dimitiva como metropolitano. Alora, in le etate de 80 annos, ille iva ancora un vice a Frisia pro predicar le evangelio al populo frisian. Ma le 5 de junio de iste anno Bonifacius e su companios esseva attaccate e occidite per un gruppo de paganos. Pro proteger se ille teneva un biblia super su capite, ma un spada perciava le scriptura sancte e poneva fin a su vita terrestre, un vita que ille habeva toto dedicate a Deo e al evangelio. Su ossos es conservate in Fulda e on dice que su cranio se trova in le ecclesia catholic de Dokkum. In iste parve urbe frisian duo monumentos rememora Bonifacius, a saper le fonte medicinal e le capella, situate in le parco detra le fonte. Cata anno iste monumentos attrahe multe visitatores. FRANSKE PERSIJN |