In le Schott Glaswerke de Mainz in Germania on face vitro, cuje transparentia es variate per medio de un tension electric. Isto es possibile proque on ha coperite le superficie del vitro per un multo tenue strato de "electrochromo" cuje qualitates optic cambia sub le influentia de un tension electric. Le material se compone de trioxydo de wolfram e isto se trova inter duo altere tenue stratos de oxydo de indium e de stanno que functiona como electrodos, A causa del tension electric inter le stratos de electrodos le electrones va del material electrochromic a ille stratos. Alora il ha un cambiamento in le transparentia del strato electrochromic, que deveni plus obscur. Interruption del tension significa que le electrones va retro e le strato deveni plus transparente. De facto il se tracta hic de processos de oxydation e de reduction causate per le tension electric. Si on applica iste vitro electrochromic al fenestras de nostre casas, on pote regularisar le quantitate de lumine solar que entra e le quantitate de calor que sorti per le fenestra. |