per Franske Persijn Durante le Secunde Guerra Mundial io habitava in le insula Goeree Overflakkee, ubi io esseva alumno del R.H.B.S. (= Schola Secundari) de Middelharnis. Ora io es ancora membro del club "Amicos del R.H.B.S de Middelharnis". In le bulletin de iste club io trovava le historia sequente, que es "quasi troppo belle pro esser ver". In le vespere de dominica del 1 de februario le fluxo, que habeva rumpite le dicas, attingeva Middelharnis. In le edificio del R.H.B.S. circa 25 homines habeva cercate protection contra le aqua. Illes habeva portate con se qualque victualias, un quantitate de aqua potabile in situlas e anque drappos e coperturas de lecto. On se installava al prime etage. Alora, in le nocte le refugiatos audiva le mugito de vaccas. Post inspection il se monstrava que tres vaccas que non plus habeva terra sub le patas, natava circum le schola. On elaborava un plano pro salvar le animales al luce del jorno. Un del homines, le veterinario del village, prendeva le initiativa pro le construction de un rate. Con materiales, trovate in le schola, on lo construeva. Le aurora veniva. Ma il se monstrava que le grande porta del schola esseva dislocate de sorta il non esseva possibile de aperir lo. Ma felicemente on succedeva tosto a aperir un parve porta posterior. Tamen, ante que le salvatores poteva portar foras lor rate, illes debeva retirar se rapidemente. Duo vaccas (le tertie se habeva regrettabilemente necate) natava guidate per le sono del voces human al porta. Luctante con grande effortio illas entrava per le porta e montava le scalas al etage le plus alte. Tunc le refugiatos arrangiava un stabulo a iste etage. Al mansarda illes trovava un pila de palea que habeva servite como imballage. Hic le palea poteva servir como nutrimento pro le vaccas. Le parve quantitate de aqua potabile debeva restar reservate pro le homines. Ma on trovava un solution pro le vaccas. In le schola il habeva un grande aquario pro pisces tropical. A causa del panna de currente electric le aquario careva del calefaction necessari, de sorta que tote le pisces jam esseva morte. On removeva le cadaveres del pisces e felicemente le aqua esseva ancora assatis bon pro poter abiberar parsimoniosemente le duo vaccas. Post un septimana le aqua super le terreno circum le schola habeva talmente bassate que on poteva ducer foras le animales, que vadante in le aqua pauco profunde poteva attinger le nave inviate pro le transporto del bestias |