Le augmentation del temperatura que es le consequentia del effecto de estufa pote ducer a un cambiamento de climate con i.a. un altiamento del nivello del mar que essera un medie metro al fin del seculo. Un perspectiva inquietante! Le causa principal: un excesso de dioxydo de carbon in le atmosphera. Iste disveloppamento, a su vice, va haber in le mundo enorme consequentias social que ora nos pote evalutar solmente in maniera limitate. Ben que le modellos de computator disponibile lassa ancora un grande mesura de imprecision e de insecuritate in le calculationes, on es, in general, convincite del facto que un continuation del emission actual de dioxydo de carbon in le atmosphera va causar cambiamentos profunde. Effecto de estufa Le notion de "effecto de estufa" es prendite del action de estufas in le horticultura. Le vitro permitte le entrata del lumine solar, ma pone impedimentos al calor sortiente. Isto causa le augmentation del temperatura in le estufa. Le atmosphera circum le terra functiona in le mesme maniera que le vitro. Certe gases in le atmosphera, super toto dioxydo de carbon (CO2), absorbe le radiation de calor. Iste gases, que on nomina anque gases de estufa, retene le calor que haberea disparite in le spatio, e per iste action illos contribue al calefaction del terra. Quanto plus de iste gases in le atmosphera, tanto plus le temperatura va altiar se. Gases de estufa Certemente non omne gases in le atmosphera absorbe le radiation de calor. Nirogeno e oxygeno, que insimul constitue 99 % del atmosphera, absorbe a pena iste radiation. Ma dioxydo de carbon (0,03 %), al contrario, es un gas que absorbe multo ben. In plus methano (CH4), dioxydo de nitrogeno (NO2), le compositos carbonic de chloro, de fluor e de hydrogeno, e ozono (03), joca un rolo importante. Anque vapor de aqua pote esser considerate como un gas de estufa. In consequentia de activitates human le omission de iste gases in le atmosphera ha multo augmentate desde le comenciamento del seculo passate. Le fontes principal del emission de methano es: combustion del biomassa, risicultura humide, elevation de bestias e le tractamento de detritos. Dioxydo de nitrogeno proveni del combustion del biomassa e del emission ab le solo, de vegetationes natural, ma anque del uso de stercore nitrogenic in solos agricultural. Dioxydo de carbon: componente principal! Concernente le effecto de estufa le dioxydo de carbon es le componente principal de atmosphera e circa 50 % del effecto de estufa que on expecta, proveni de iste gas. Le altere 50 % es causate in grande parte per methano e le dioxydo de nitrogeno. Le augmentation del CO2 es ora circa 0,5 % per anno. Le causa principal del augmentation del percentage de CO2 es le combustion de combustibiles fossile (traffico, centrales de energia, industria). In ultra le combustion de material vegetal e le destruction del foreste tropical joca un rolo importante. Effecto de estufa origina cambiamento de climate Le augmentation progressive del percentage de CO2 in le atmosphera provoca, secundo le expectationes, un duplicamento del percentage de CO2 circa le anno 2030. In consequentia de isto on expecta, como es indicate per le modellos actual de climate e si on continua le politica actual, un altiamento del temperatura median de circa 1 C in le anno 2025 e de 3 C ante le fin del seculo. In le anno 2030 le nivello del mar habera montate de 20 cm e al fin del seculo de 65 cm. Iste effectos parla fortemente al imagination. Super toto le altiamento del temperatura causara cambiamentos in le climate terrestre.Illo provoca modificationes del circulation aeree, del currentes marin e del repartition del precipitationes in le diverse zonas de climate. In le previsiones de iste factores se cela anque le plus grande incertitudes. On expecta que le cambiamentos essera le plus grande verso le polos e minus grande in le regiones equatorial. Esque le cambiamentos de climate jam es perceptibile? In iste momento on non jam pote demonstrar statisticamente un cambiamento de climate. Le variatationes de temperatura del extremos meteorologic se trova ancora intra le variation natural del climate. Ma il es clar que, si on continua emitter gases de estufa, le cambiamento de climate va esser perceptibile e mesurabile a curte termino. E quando on va constatar lo, le restauration del situation de hodie va esser extrememente difficile, forsan impossibile. Nam le mesuras que on debe prender alora, ha un impacto profunde super le societate e exige forte adaptationes del patronos de production e de consumo. In ultra on debe prender mesuras a scala mundial pro esser efficace. Ben que le modellos de climate tene conto de un altiamento del temperatura, illos da solmente un idea limitate del real cambiamentos futur del climate super le hemispherio septentrional, super toto concernente le precipitation annee median e su repartition saisonal e regional. Le evalutationes quanto al tropicos e al hemispherio meridional es ancora plus inexacte. Pro isto il non es ancora clar si le climate va esser plus sic o plus humide in le zona climatic temperate. Totevia il ha indicationes del facto que on debe expectar un intensification del extremos metereologic como tempestas e temperaturas exceptionalmente alte e basse. |