Prof. Toma Macovei, autor romanian de tres libros in Interlingua (Joieles spiritual, Ab le auro spiritual del scena e del schermo, Le vita anecdotic del homines illustre) ha facite un continuation de su obras, del qual nos presenta hic un anecdota super Archimedes. Illo es de origine grec, significante "io ha trovate" e debite a un discoperta facite al hasardo. Archimedes, famose mathematico e physico grec del antiquitate, ha vivite a Syracusa (verso 281-212 a.J.C.). Ille trovava le formulas donante le superficie e le volumine del cylindro e del sphera secundo un methodo proprie, que ha anticipate le calculo infinitesimal. Ille inventava diverse dispositiones mechanic: levator, vite sin fin, rota dentate. Ille faceva resister durante tres annos al romanos qui assediava Syracusa, on pretende, incendiante le naves inimic per medio de speculos reflectente e concentrante le radios del sol. Post le conquesta del urbe, le general Marutius donava le ordine de sparniar le vita del grande homine, ma, secundo le legenda, ille ha essite occidite per un soldato qui non le cognosceva, durante que le scientista era absorbite in calculos, designante alicun circulos in le sablo. Alora ille haberea pronunciate le parolas devenite aphorismo: "noli me tangere circulos meos"! Un circumstantia del vita de Archimedes se liga al discoperta de un principio fundamental del hydrostatica. Le rege de Syracusa, Hieron, qui habeva ordinate a un aurifice un corona de auro, le suspectava de haber alligate in illo argento. Ille consultava Archimedes super le medio de discoperir le fraude, conservante intacte le corona. Le illustre scientista reflectava longe tempore a iste problema, usque al die ubi, in su banio, ille appercipeva que su membros submergite in aqua perdeva un parte de lor peso. Assi ha intuite ille le principio que porta su nomine: Cata corpore mergite in un liquido suffre un pulsata vertical, dirigite de basso in alto, equal al peso del fluido displaciate. In le enthusiasmo de iste discoperta, Archimedes sortiva ex le banio e se lanceava in le stratas, critante: eureka! eureka!, que de alora ha devenite un exclamation de grande enthusiasmo coram un discoperta inattendite e del trovar de un solution pro un problema difficile. |