Nostre galaxia es un disco de stellas, de gas e de pulvere. Le spissitate de iste "torta de patella" depende de un sorta de equilibrio inter le gravitate e le rotation del systema. Un gruppo de astronomos de Mexico, Germania e Italia ha demonstrate theoreticamente que anque le pression de radiation influe le spissitate. Iste pression minuscule rende le disco un pauco plus spisse e in certe locos illo pote causar le expulsion de pulvere e de gas. Pulvere e gas es presente in le disco del galaxia in le forma de grande nubes.Le influentia del pression de radiation super tal nubes depende in mesura importante del relation inter gas e pulvere. Isto es le mesura que energia kinetic es transmittite del pulvere al particulas de gas. Gas isolate non es influite per le pression del lumine stellar. Le intensitate del pression super le pulveres depende de lor forma, volumine e composition e del longor de undo del lumine stellar. Ubi le relation inter pulveres e gas es debile (p.e. in le caso de un densitate multo parve de gas), le pulveres pote haber un grande velocitate causate per le pression de radiation e il ha le possibilitate que illos es expulsate ex le disco del galaxia. Ubi le relation es forte, le pulveres transmitte multe energia kinetic al gas que essera expulsate con le pulveres. In iste maniera gas e pulveres pote esser elevate in le forma de un sorta de "fontanas" foris del plano del galaxia. Iste phenomeno es nominate "photolevitation" per le astronomos. |