Esque vos ha jocate con soldatos de stanno, de plumbo o de papier-maché? Sape vos que il existe multe altere figuras, platte o rotunde, de formatos inter duo e dece centimentros? In le ancian museo de Ommen, centro touristic in Overijssel, vos pote admirar un enorme quantitate de iste parve obras de arte. Le plus grande parte, decorate per mano artistic, es exponite in dioramas grandiose. Desde le prehistoria le homine ha facite figuras. In le 18-e seculo un ver industria se ha establite in le urbe german de Neurenberg, ubi on faceva non solmente soldatos, ma anque figuras del societate civil, del flora e del fauna, figuras de edificios complicate e de carrossas antique. Le plus sovente le figuras de Neurenberg esseva platte e facite de un alligato de stanno e de plumbo. Ma tosto on comenciava crear figuras semirotunde o tridimensional, facite de un varietate de materiales. Le museo de Ommen monstra iste disveloppamento gradual per un interessante serie de collectiones superbe. Le collectiones le plus attractive es sin dubita le creationes del doctor Wieringa, un professor de mathematica, qui ha dedicate un grande parte de su longe vita al confection de 53 splendide dioramas historic. Io vos invita a admirar iste milles e milles de parve objectos curiose. Vostre oculos essera occupate sin interruption e naturalmente vostre infantes essera multo enthusiastic. Io es certe que le visita del museo restara pro vos e vostre familia un memoria inoblidabile. Le museo es domiciliate in un del plus ancian edificios del urbe, un casa de pedage, que data del anno 1432. In 1828 illo deveniva le casa municipal de Ommen, e finalmente le museo in 1985. |